من وين أجيب ليك الفرح

من وين أجيب ليك الفرح
من أي سكة وياتو باب
ما إنت تاكيت الهنا
خليتو زي رقراق شمس
وسقيتو كاسات العذاب
وأنا وين أمش ؟؟؟؟
لو كنت في دروبك شقيت
هدهدت أوجاعي القبيل
وبراي مشيت
رغم الصعاب
سكّنت جواي الصبر
فتشت لي روحي العذر
يمكن أكون منك شفيت !!!
لكن وحاتك ما لقيت
غير حبك الجواي عنيد
مستعصم الوجدان مصير
قول ليا كيف وأنت البعيد !!!
وأنا روحي تتشهق هواك
شايلة الحنين بين الضلوع
وإتسربل الشوق من جديد
ما جــــــاك هناك ؟؟؟؟
إلا القدر واقف حلف
لا يوم أجيك ولا تصل
لا يسرقك من عيني طيف
لا سفني في مرساك تقيف
نبكي الليالي أسى وضياع
نتقاسم الهم والنزيف
والليلة جيت تسألني ليه
ما إنت سديت الطريق
وحنيني فيك الإنجرح
من وين أجيب الضحكة ديك
من وين أجيب ليك الفرح
وريني بس من ياتو باب؟